بوابة العرب اليوم
…….( إرحل يا ليل )……..
=====
ياليل مخبى آهات
ودموع على أوجاع
ياما عشنا فى الحكايات
مع ألف حلم وضاع
ورسمنا وردة عبيرها
بيفوح فى كل مكان
وسمانا حاوطت طيرها
تحميها م الطيران
ياليل نسيتنى خلاص
واللا نسيت الناس
أهرب لفين م الزحمة
وأنا ياليل حساس
فاكر زمان
مش قولتلك
أكيد فى يوم
هتنسى حلمى
البرئ معاك
فاكر كمان
إشتاقتلك
جيت بالهموم
وزيدت همى
وزاد أساك
يا ليل إرحل على كيفك
معدش هوايا على كيفك
يا ليل كلك ضلام
شايل هموم وآلام
وإن قلبى بعت سلام
ما خلاص لقيت وليفك
طبعا قمر وهو بعد جماله إيه
حقك يا ليل على قلبى إنك تدوس عليه
لكن عتابى عتاب صغير
خلتنى بس أحب ليه
ما أنا قولتلك م البداية
القمر مين يقدر عليه
قولت لأ تعال قرب
وجريت عليك وقولت أجرب
عيشتنى فى حكاية أغرب
من أى حلم حلمت بيه
إرحل يا ليل خلاص كفاية
ما إنتاش دليل ولا معايا
إرحل يا ليل وروح بعيد
إوهم جريح إنك تعيد
حلم تايه من سنين
إفرد كمان ليه الإيدين
أصلك يا ليل بياع كلام
بياع هموم دمع وآلام
بياع جراح بياع عذاب
وإن حد جالك بيدق باب
تخطف في لحظة فرح الشباب
والجد ييجى ..وتقول سلام
